مرجحة فتحي ولغز رمضان.. أخطاء فايلر القاتلة في مباراة النجم الساحلي

تحليل: محمود النجار

قبل ما اتكلم على أخطاء رينيه فايلر القاتلة في مباراة الأهلي النجم الساحلي وعشان محدش يزايد أعترف ان فايلر عمل في الاهلي في فترة قصيرة اللي معرفش يعمله مدربين كتير في شهور ويمكن سنين.

وكمان اعترف ان الحكم ساهم طبعا في هزيمة الأهلي من النجم الساحلي اللي كان نازل مرعوب مننا لكن دا لا يعفي أبدا فايلر من المسؤولية  واننا ننتقد طريقة تفكيره واستعداداه للمباراة.

لكن بهدوء كدا وبعيدا عن الهيصة بتاعة الحكام والتحكيم الأفريقي -اللي جزء كبير منها صحيح- تعالوا نسأل سؤال مهم لازم نجاوب عليه .. الأهلي راح بكام كورة على الجول؟!

فاكرين طرد أحمد السيد؟

بالنسبة لموضوع الطرد اللي كتفنا  حابب أفكركم أفكركم في دوري 2004 أول مباراة لأبوتريكة أمام الزمالك في الدقائق الأولى الحكم طرد أحمد السيد نتيجة اشتباكه مع لاعب الزمالك وقتها حسام حسن مش كده وبس الفاول دا جاب منه بشير التابعي الجول مباشرة  فدفع  مانويل جوزيه بحسام عاشور (اللاعب الناشئ وقتها) ولعبنا بعشرة اللاعبين وتسيدنا المباراة وكنا الاخطر طوال وقت المباراة صحيح انها انتهت 2-1 لكن الاهلي قطع الزمالك يومها.

الخطة الأصلية:

قبل الطرد وقبل ما يحصل أى حاجة فايلر داخل يلاعب النجم الساحلي على أرضه بطريقة تقريبا 4-1-4-1 (أو بصيغة تانية 4-1-2-2-1)  وهى نفس الطريقة اللي لعب بيها مع الجونة ونجحت جدا بدليل ان الاهلي فاز 4-صفر لكن هنا لازم نسأل نفسنا بمنتهى البساطة هو ينفع ألاعب فريق بحجم النجم الساحلي وعلى أرضه وسط جمهوره  بلاعب ارتكاز واحد (عمرو السولية)؟

حد هيقولي الراجل بيلعب بشكل هجومي وميهموش بيلعب فين.. طبعا دا كويس بس كان لازم أكون مأمن وسط ملعبي كويس لأن دا فيه مخاطرة شديدة انه بيفضي نص الملعب لو الاربعة اللي قدام لاعب الارتكاز (وليد سليمان ومجدي افشة ورمضان صبحي وحسين الشحات) ملحقوش يرجعوا في لو الكورة اتقطعت ودا اللي حصل بالضبط في كرة الهدف.

أخدت بالك من خوف مجدي أقفشة وحرصه الشديد وهو بيهاجم ؟! دا لأنه عارف ان وراه شوارع مفيش حد فيها غير السولية ولو اتقطعت الكورة هتبقى كارثة

من حسن حظنا ان النجم الساحلي لم يدرك الثغرة دي أو أدركها ولم يحسن استغلالها الا في كرة الهدف وكام كرة بعدها استهتروا في انهائها بشكل جيد وكان ممكن النتيجة تبقى أكبر من كده ربنا ستر.

تغيير ما بعد الطرد

طبعا كان لازم  يحصل تغيير لان اللي اتطرد دا مش لاعب في اى مركز لاعب في قلب الدفاع ولازم تغير من تكتيكك وتسحب حد من المهاجمين خاصة ان النتيجة تعادل خارج أرضك مش النتيجة اللي تزعلنا اوى لكن المشكلة انت غيرت مين ونزلت مين؟

سحبت وليد سليمان أقوى واحد في الاربعة اللي تحت راس الحربة وأحسنهم أداء وأقدرهم على الاحتفاظ بالكرة, طيب نمشي مع فايلر لحد الآخر ونقول ان مجدي افشة أقدر على اللعب كلاعب ارتكاز أحسن من وليد أوك يبقى الطبيعي اللي ينزل هو ياسر ابراهيم مش محمد هاني ليه؟

وهو أصلا ليه ياسر ابراهيم يقعد والاعب أيمن أشرف اللي في المبايات الكبيرة بيرتبك كتير ويرتكب أخطاء ساذجة فاكرين ماتش بيراميدز في الكاس؟

لأن  ياسر ابراهيم مش غريب عن المكان دا ثانيا انت مش هتعمل اى خلخلة في تركيبة الملعب سوى انه هيبقوا 3 قدام لاعب الارتكاز لكن نزول هاني خلاك ترجع السولية مدافع وتضم احمد فتحي للنص.

تغيير أزارو مكان الشحات

كان لازم الدفع بمهاجم مجهوده عالي أوى زى وليد أزارو لكن مش على حساب حسين الشحات أو لو هتخرج حسين كنت ترجع جونيور أجاى لورا شوية فمش معقول تلعب براسين حربة وعندكش حد  يوصلهم كورة أصلا رمضان صبحي واضح انه مش في مستواه ووليد سليمان خارج (عشان كده كنت شايف ان مش وليد سليمان اللي يخرج).

مرجحة أحمد فتحي

لما أصيب على معلول تم تغييره باللاعب اليوديانج وهو لاعب مجهوده وفير وكان لازم ينزل بس المشكلة فين المشكلة بقى انه نقل احمد فتحي ناحية الشمال يعني أحمد فتحي لعب 3 مراكز ف نفس المباراة وده يشتت اى لاعب حتى احمد فتحي في عز قوته وشبابه فاكرين مرة مانويل جوزيه عملها امام الزمالك في ماتش 2-2 لما كان بيدربه حسام حسن وخلص 2-2   لكن فتحي ملعبش بجنيه يومها.

لعز رمضان صبحي:

ولا لغز ولا حاجة صبحي طول عمره بيلعب ناحية الشمال لكن فايلر لما حس ان الشحات بيحتك بالباك الشمال بتاع النجم الساحلي فضل يودي رمضان صبحي ناحية اليمين ودا الحقيقة موت الاتنين لا الشحات اداني في الناحية الشمال ولا رمضان عرف يعمل اى حاجة لأن عدلته في الشمال وهو بيبدع فيها من ساعة ما كان في أشبال الاهلي وفي كل الاندية اللي لعب فيها

أخطاء رينيه فايلر القاتلة في مباراة الأهلي النجم الساحلي

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *