Home سلايدر إنذار لفايلر قبل ما تتكرر كارثة الترجي وصن داونز: أبوس إيدك خف التأليف شوية

إنذار لفايلر قبل ما تتكرر كارثة الترجي وصن داونز: أبوس إيدك خف التأليف شوية

by المحرر
إنذار لفايلر قبل ما تتكرر كارثة الترجي وصن داونز

بقلم: محمود النجار

من ساعة مباراة النجم الساحلي وأنا حاطط إيدي على قلبي وبدعي ربنا ان تكون مخاوفي دي مجرد هواجس أو أخطاء وتعدي، بس الحقيقة رينيه فايلر من ساعتها لم ينجح في تبديد المخاوف دي بالعكس كل شوية بتزيد.

على فكرة أنا هنا مش بحكم على فايلر وأنا شخصيا ضد الحكم على مدرب قبل ما يلعب نصف موسم على الأقل، لكن خوفي على الأهلي هو اللي دفعني للكلام والتحذير المبكر للي بيعملوا فايلر وكتير مش واخد باله منه علشان الانتصارات والنتايج الحلوة.

مباراة وادي دجلة كشفت حاجات كتير صعب نتغاضى عنها ونسيبها تعدي علشان متغرناش النتايح وتتكرر كارثة الترجي وصن داونز تاني.

دجلة كشفنا

فريق يقبع في قاع الدوري فكر بس يعمل سترتش للملعب يشكل علينا خطورة وكنا هنلبس جول لولا براعة محمد الشناوي كان ممكن تغير شكل المباراة تماما ولما فريق بالامكانيات المتواضعة دي يحرجنا في الشوط الأول كده لحد ما جول رمضان هدانا شوية وركزنا أمال لما نقابل فريق زى صن داونز ولا الترجي ولا حتى مازيمبي ممكن يعمل فينا إبه؟!

صدقوني دا خوف مش تشاؤم، وحرص على مستقبل الفريق مش تكسير مجاديف ولا تصدير احباط بالعكس ممكن نعتبر دا قلم يفوقنا من سكرة الانتصارات الفترة الأخيرة.

فاكرين دوري انبي؟

حد هيقولي احنا متصدرين الدوري بالعلامة الكاملة لحد دلوقت أحب أفكره بدوري 2003 اللي ضيعه مننا انبي  فاكرينه؟ السنة دي بدأنا مكتسحين كل الفرق وفزنا كل مباريات الدور الأول ومخسرناش ولا نقطة باستثناء مباراة الزمالك في آخر الدور واتعادلنا فيها 2-2   لدرجة ان أحمد بلال حصل على هداف الدوري بـ19 هدف كلهم في الدور الأول وبعد كده أصيب.

ثم إن الدوري مش غاية يعني مش معضلة بالنسبة للأهلي انه ياخده أنا عيني كأهلاوي مشجع لفريق كبير عظيم على بطولات أفريقيا وكاس العالم؟

  هتقولوا طيب إيه تحديدا اللي مش عاجبك يا عم الفلحوس في قرارات فايلر وطريقة لعبه.

ماشي مع إني شامم ريحة تريقة بس هجاوب

خطأ الديفندر الواحد

أولا إصرار فايلر العجيب على اللعب بديفندر واحد كارثة بندفع تمنها كتير، ويا ريت متقوليش دا عشان بيلعب كرة هجومية جميلة عشان هقولك تعالى نحللها بالعقل.

أولا دا مينفعش في اللعب في المباريات الأفريقية مع الفرق الكبيرة واحنا شفنا نتيجة دا مع النجم الساحلي، دا ينفع في الدوري ومش مع أى فريق علشان لو لعبنا بالشكل دا مع فرق كبيرة في الدوري هنعاني معاناة السنين.

تحجيم أقفشة

المشكلة الأكبر بقى انك حتى باللعب بعمرو السولية لوحده كهاف ديفندر انت بتخسر مجدي أقفشة إزاى؟ حتى وانت معتبر أقفشة بلاي ميكر هو نفسه بيلعب وهو خايف لأن أى غلطة منه أو قطع للكورة هتشكل خطورة كبيرة وعشان كده اقفشة مظهرش في ماتش النجم الساحلي لأن الاسم ان تحت راس الحربة انما فعليا هو هاف ديفندر تاني يبقى ايه فين الفكرة؟

أجاى وأزارو

ثانيا: اعتماد فايلر الاساسي على أجاى كراس حربة اللي ابداعه كله ان يلعب تحت راس الحربة وراكن وليد أزارو اللي ناس كتير عايزاه يمشي لكن وليد من أروع المهاجمين اللي جم في تاريخ مصر كون انها ممشتش معاه الموسم اللي فات فدا بيحصل لأى حد مهما كان كبير.

ديانج

ثالثا: ديانج لاعب هايل ومتحرك ومقاتل وبيصنع الفارق ليه يا عم فايلر دايما حاطه احتياطي؟ ووليد سليمان مع الاعتراف بأنه من أعظم وأخلص اللاعبين اللي جم الأهلي لكنه واضح ان عنده مشكلة الفترة دي بدليل انك بتغيره كل فترة مع انك لو عايز تستفيد بامكانياته فترة من الوقت نزله في وقت متأخر تكون قوة لاعبي الخصوم بدأت في التناقص.

لغز ياسر إبراهيم

اللغز الكبير بقى استبعاد ياسر إبراهيم ومرة يلعب بأيمن أشرف ومرة بفتحي اللي انت بتشيله من مركزه وتلعب هاني اللي غلطاته بكوارث على فتحي أو مكانه.

أخيرا عشان منطولش دفاعنا فيه كوارث خاصة مع الكور العرضية والطولية اللي بتتسقط من فوق السواية (اللي واقف وحده كارتكاز).

وللحديث بقية    

اقرأ أيضا

Leave a Comment